Oficialidá: el PSOE niega derechos fundamentales(www.lanalona.blogia.com)

 

Tamos asistiendo de nueu a una estratexa de desprestixu pa cola oficialidá de la llingua asturiana por parte del PSOE .Esti partíu sigue ancláu na so posición ríxida que paez propia d´otros gobiernos non precisamente democráticos. La FSA que nun tien argumentos y lo que ye peor nun tien voluntá de diálogu , puesto que nun quieren nin aconceyase con naide pa falar so esti tema, nun sabe más qu´intentar meter mieu a la población con una supuesta obligatoriedá d´adeprender asturianu como si l´exerciciu d´un derechu fundamental como ye´l derechu a falar la propia llingua significara que toos lo tuvieren qu´adeprender.

Pero partiendo de que´l procesu d´oficialidá sedrá ´l que Asturies escueya y nun tien por que ser igual al d´otres comunidaes, ta ñegándosenos un derechu fundamental recoyíu na Constitución española que tanto s´afanen en defender pa otres coses. ¿Ye que son constitucionalistes pa unes coses y pa otres non?. Pues la Constitución ye bien clara cuando diz nel so artículu 3 que toles demás llingües del estáu sedrán oficiales nes sos respeutives comunidaes. Esto que paez asumío ya en toa España , tien equí una resistencia numantina por parte de la FSA y del PP (éstos últimos ,de manera más ambigua, tamién tan entamando a asomar la so posición contraria a la Oficialidá). ¿Onde ta ´l partíu que tanto diz defender la España Plural? ¿Onde ta´l partíu que según el so secretariu d´organización representa al partíu de los derechos cívicos y ciudadanos? ¿Ónde ta´l partíu qu´en Madrid diz que ye bona la oficialidá nes distintes comunidaes pa la convivencia ente ciudadanos?.Sedría bono que tol mundu viera les declaraciones del portavoz del PSOE nel Congresu falando de la pluralidá llingüística.(Diariu de sesiones del 7 de febreru de 2006) ¿Ye qu´equí n´Asturies nun asumen lo que dicen los del mesmu partíu en Madrid?.¿Sedrá que n´Asturies nun pertenecemos a esa España Plural? ¿Sedrá que nun tenemos derechu a tener derechos cívicos y ciudadanos? ¿Sedrá que los que falamos asturianu nun sabemos convivivir colos castellanofalantes? ¿Realmente estos señores representen a los sos ciudadanos?.¿Son realmente demócrates estos políticos?

Nun tamos pidiendo namás que se mos reconoza un derechu recoyíu tanto na Declación Universal de Derechos Humanos, como na Constitución Española. Trátase d´un derechu fundamental que n´Asturies nun ta reconocíu y al que´l pueblu asturianu tien derechu porque forma parte del so ser.

Ye significativo qu´estos políticos que mos gobiernen nun son valientes p´afrontar d´una vegada esti tema y dexen en manes de Conseyos Consultivos (por cierto ¿saben ustedes que los que formen esi Conseyu siempre fueron detractores del tema del asturianu?) decisiones que muncho mos tememos que nun seyan ná positives pa la supervivencia del nuesu idioma.¿Por qué nun lleen los resultaos de les distintes encuestes onde se ve una clara posición favorable a la oficialidá y que por cierto fueron encargaes por dellos gobiernos socialistes y feches por una persona socialista de gran prestixu, direutor del Euskobarómetro? ¿Ye que nun cunten les miles de persones que dende va años se manifiesten pola Oficialidá?¿Y los miles de pas/mas, neños/es ya adultos en xeneral qu´escueyen asturianu nes escueles y van a clas de llingua? ¿Ye que sólo valen les encuestes cuando ellos quieren o pa lo qu´ellos quieren?

La nuesa llingua ye una de les llingües en peligru d´extinción y ye responsabilidá de los nuesos gobernantes garantizar la so supervivencia, cosa que namás se garantiza cola Oficialidá y con posteriores midíes pa desendolcala. De nun ser asina, estos gobernantes (incluida la oposición qu´ agora nun gobierna) sedrán los responsables de la muerte paulatina de la llingua asturiana y sedrán les xeneraciones futures les que-yos pidan cuentes de porqué nun heredaron una cultura que teníen y que -yos la dexaron morrer.

Ante la reforma l´Estatutu nun cabe más que la reconocencia por fin d´un derechu fundamental . Si nun fuera asina quedaría de nueu zarráu en falsu y sedremos munchos y munches asturianos y asturianes los que nun mos sentiremos reconocíos nel mesmu De demócrates ye saber reconocer los derechos de la ciudadanía anque nun se tea d´alcuerdu con ellos .