Artículu asoleyau por Sixto Cortina nel Comerciu"El Ridea: Asturies, secuestrada"
El llamentable sucesu qu'acompañó esti día la inauguración, de parte del Real Institutu d'Estudios Asturianos (Ridea), del primer Congresu d'Estudios Asturianos, enseñó la peor cara d'una institución que sobrevive fuera del so tiempu. La testerona decisión de los organizadores del congresu, xustificada pol presidente del Institutu, de torgar una comunicación presentada por aportar redactada n'asturiano nun ye un enquívocu o una xelonada coyuntural nin puede esplicase poles persones concretes a les que-yos tocó representala. La censura d'un testu n'asturiano, la represión d'un derechu humanu como'l d'espresase na propia llingua, ye parte de la sencia mesma de la institución, creada, sofitada y caltenida pa secuestrar Asturies de la lluz claro del sol.
El Ridea ye, dende'l so aniciu, un proyectu destináu a trancar nuna urna de cristal a Asturies, la so llingua y, en xeneral, 'lo asturiano', pa caltenela, con respiración asistida, fuera del so mediu natural, y evitar asina que medrara y se fixera mayor. Esta peculiaridá del franquismu n'Asturies, recoyer la morribunda llingua asturiana, escondela de la claridá y de los güeyos 'malintencionaos' y alimentala namás lo que ficiera falta pa que nun morriera de fame, dio nun discursu que tovía güei se puede sentir dayure y que s'entiquetó como 'asturianía'. Un conceptu que renuncia a que 'lo asturiano' seya suxetu de la Historia y qu'arreya la so suerte a la xeneral de 'lo español', guardando les reliquies nun arcón vieyu al que los sos guardianes nun dexen que naide desapovise.
Pero secuestrar asina la cultura asturiana, con too y con ello lo que yera'l franquismu, obligaba dacuando a emporcar les manes. Por exemplu, conocíes de sobra son, por mor de dellos investigadores, les tribulaciones de los diccionarios asturianos aposentaos nel Ridea pa ver la lluz de la imprenta, qu'hasta los de Fabriciano González, García Rendueles y García Oliveros, miembros de la institución, acabaron por editase fuera d'ella. O'l casu sangrín de los papeles de Fernán Coronas, el Padre Galo, arrequexaos varios decenios porque nun dicíen con esa interpretación de la cultura asturiana como peculiaridá de 'lo español' que'l franquismu quería guardar y, asoleyaos, abríen de xuru'l camín pa que 'lo asturiano' (la llingua y la cultura) se ficiera mayor d'edá.
Pero'l misteriu que desafía la razón ye cómo, algamada la democracia, una institución con tan gafes intenciones pa con Asturies (torturar la so llingua y cultura como se fai con un enfermu terminal al que nin se lu intenta curar nin se-y da una muerte digna) nun se desanició por falta d'aliendu social o como consecuencia d'una decisión política. Dos son les causes. La primera, que'l secuestru d'Asturies (de 'lo asturiano') foi común a tola sociedá franquista, como afitó en parte Xuan Xosé Sánchez Vicente nun artículu de títulu, precisamente, «Asturies secuestrada». Y la institución que tendría que facer el llabor del Ridea, investigar la realidá presente y pasada del país pa conocela, la Universidá d'Uviéu, nin lo facía nin lo fai, engafentada de la mesma 'asturianía'.
Asina, el Ridea ye dende va trenta años l'abellugu de les investigaciones sobre Asturies, trabayos que, en munchos casos, yá nun casen con esa visión franquista y que, n'otros, ¿hasta tienen la sobeya de presentase redactaos n'asturiano! La segunda, que tolos gobiernos estatutarios aprovecharon la vieya creación franquista pa, mientres dicíen que facíen por normalizar l'idioma del país, caltener l'áscuara d'esa 'asturianía' encesa y, con ella, la existencia del discursu d'una Asturies apareyada a un conceptu más grande e importante que nun-yos descuaxeringase la so primacía social.
Pero como les coses tienen caminao muncho dende la muerte del dictador y la xustificación de la 'asturianía' y el secuestru d'Asturies, benditu daquella pola mayoría de la sociedá, ye un anacronismu; como hai yá una potente reivindicación de derechos llingüísticos y d'una Asturies suxetu de la historia; como hai persones que s'atreven a presentar comunicaciones n'asturiano a un congresu entamáu pol Ridea, entós, nun queda otra que la censura.
La mio enorabona a Yolanda Magdalena Montes por presentar una ponencia n'asturiano al congresu, y a Xosé Lluis Campal y a Javier Fernández Conde por facer xestos de protesta, porque ellos intenten rescatar a Asturies del secuestru que tovía güei sufre.
El mio duelgu pa tantos bonos investigadores sobre Asturies, aficionaos o profesionales, que tienen asientu nel Ridea y que podíen convivir con una Asturies 'lliberada', pero a los que nun los van dexar. La mio censura pa la conseyera de Cultura, Ana Rosa Migoya, que delantre de la conculcación d'un derechu humanu, el d'espresase na so llingua nuna institución pública del so país, namás se-y esmuz que l'asturiano nun ye cooficial. Ella ye cómplice del secuestru.
El Ridea ye, dende'l so aniciu, un proyectu destináu a trancar nuna urna de cristal a Asturies, la so llingua y, en xeneral, 'lo asturiano', pa caltenela, con respiración asistida, fuera del so mediu natural, y evitar asina que medrara y se fixera mayor. Esta peculiaridá del franquismu n'Asturies, recoyer la morribunda llingua asturiana, escondela de la claridá y de los güeyos 'malintencionaos' y alimentala namás lo que ficiera falta pa que nun morriera de fame, dio nun discursu que tovía güei se puede sentir dayure y que s'entiquetó como 'asturianía'. Un conceptu que renuncia a que 'lo asturiano' seya suxetu de la Historia y qu'arreya la so suerte a la xeneral de 'lo español', guardando les reliquies nun arcón vieyu al que los sos guardianes nun dexen que naide desapovise.
Pero secuestrar asina la cultura asturiana, con too y con ello lo que yera'l franquismu, obligaba dacuando a emporcar les manes. Por exemplu, conocíes de sobra son, por mor de dellos investigadores, les tribulaciones de los diccionarios asturianos aposentaos nel Ridea pa ver la lluz de la imprenta, qu'hasta los de Fabriciano González, García Rendueles y García Oliveros, miembros de la institución, acabaron por editase fuera d'ella. O'l casu sangrín de los papeles de Fernán Coronas, el Padre Galo, arrequexaos varios decenios porque nun dicíen con esa interpretación de la cultura asturiana como peculiaridá de 'lo español' que'l franquismu quería guardar y, asoleyaos, abríen de xuru'l camín pa que 'lo asturiano' (la llingua y la cultura) se ficiera mayor d'edá.
Pero'l misteriu que desafía la razón ye cómo, algamada la democracia, una institución con tan gafes intenciones pa con Asturies (torturar la so llingua y cultura como se fai con un enfermu terminal al que nin se lu intenta curar nin se-y da una muerte digna) nun se desanició por falta d'aliendu social o como consecuencia d'una decisión política. Dos son les causes. La primera, que'l secuestru d'Asturies (de 'lo asturiano') foi común a tola sociedá franquista, como afitó en parte Xuan Xosé Sánchez Vicente nun artículu de títulu, precisamente, «Asturies secuestrada». Y la institución que tendría que facer el llabor del Ridea, investigar la realidá presente y pasada del país pa conocela, la Universidá d'Uviéu, nin lo facía nin lo fai, engafentada de la mesma 'asturianía'.
Asina, el Ridea ye dende va trenta años l'abellugu de les investigaciones sobre Asturies, trabayos que, en munchos casos, yá nun casen con esa visión franquista y que, n'otros, ¿hasta tienen la sobeya de presentase redactaos n'asturiano! La segunda, que tolos gobiernos estatutarios aprovecharon la vieya creación franquista pa, mientres dicíen que facíen por normalizar l'idioma del país, caltener l'áscuara d'esa 'asturianía' encesa y, con ella, la existencia del discursu d'una Asturies apareyada a un conceptu más grande e importante que nun-yos descuaxeringase la so primacía social.
Pero como les coses tienen caminao muncho dende la muerte del dictador y la xustificación de la 'asturianía' y el secuestru d'Asturies, benditu daquella pola mayoría de la sociedá, ye un anacronismu; como hai yá una potente reivindicación de derechos llingüísticos y d'una Asturies suxetu de la historia; como hai persones que s'atreven a presentar comunicaciones n'asturiano a un congresu entamáu pol Ridea, entós, nun queda otra que la censura.
La mio enorabona a Yolanda Magdalena Montes por presentar una ponencia n'asturiano al congresu, y a Xosé Lluis Campal y a Javier Fernández Conde por facer xestos de protesta, porque ellos intenten rescatar a Asturies del secuestru que tovía güei sufre.
El mio duelgu pa tantos bonos investigadores sobre Asturies, aficionaos o profesionales, que tienen asientu nel Ridea y que podíen convivir con una Asturies 'lliberada', pero a los que nun los van dexar. La mio censura pa la conseyera de Cultura, Ana Rosa Migoya, que delantre de la conculcación d'un derechu humanu, el d'espresase na so llingua nuna institución pública del so país, namás se-y esmuz que l'asturiano nun ye cooficial. Ella ye cómplice del secuestru.
0 comentarios