«Teatreru ye una definición noble pa los que vivimos el xéneru», diz Camilo Díaz

La presentación del llibru 'En tables', del dramaturgu ayeranu, abre la Selmana de les Lletres, dedicada al teatru n'asturianu

«¿Qué pasará'l día que tola trama cultural asturiana s'organice?» Con esa entruga, menos retórica que subversiva, Dolfo Camilo Díaz pon puntu final al so últimu llibru, presentáu ayeri na Biblioteca Ramón Pérez d'Ayala d'Uviéu. L'escritor ayeranu firma 'En tables. Un teatru pal sieglu XXI', la obra editada por KRK Ediciones y subvencionada pol Principáu qu'esti añu s'incorpora a la bibliografía de llibros oficiales de la Selmana de les Lletres Asturianes. La fiesta añal de la lliteratura n'asturianu llega en 2006 a la vixesimosétima edición, dedicada dafechu al teatru en llingua asturiana.

Dolfo Camilo Díaz, qu'echó mano del so sarcasmu pa xustificar la tardanza cola qu'apaeció na presentación -«pidiéronme que me retrasare pa crear nesti actu la tensión dramática necesaria»-, reconoz que «me siento identificáu col términu teatreru, porque ye la definición más noble pa los que vivimos esti xéneru». El so llibru, alvierte, «sigue la política de provocar al llector pa buscar nél un posicionamientu, porque nun queremos que seya un elementu pasivu».

L'escritor y historiador, que ye'l xefe del Serviciu de Promoción Cultural d'Avilés, siñala que «pa la xente de la cai, teatru asturianu ye teatru n'asturianu, el teatru popular que vieron los sos güelos y el que ven los sos fíos. La llingua ye un aspectu destacáu, pero nun ye fundamental». Añade que «ensin llingua, ensin cualquier llingua, hai teatru, hai llinguaxe teatral» y, por exemplu, «el nuevu teatru nun tien que ser necesariamente n'asturianu pa que seya asturianu».

Respecto a la difusión del teatru, Dolfo Camilo Díaz critica la dependencia que tien de les perres públiques. Resalta'l fechu de qu'hai un sindicatu d'actores, un circuitu profesional, relación ente les compañíes y mesmamente críticos con presencia mediática, pero «el mercáu ta condicionáu pola Conseyería de Cultura y los conceyos. Les instituciones son el principal empresariu del teatru asturianu».