EL CONCEYU ABIERTU POLA OFICIALIDÁ FAE UNA WEB PALA MANIFESTACIÓN DEL DÍA 24 DE PAYARES
El Conceyu Abiertu pola Oficialidá entamó ayeri la campaña de convocatoria pa la movilización del sábadu 24 de payares. Como novedá pa esta campaña repartiránse cien mil sobres de zucre rotulaos n’establecimientos hosteleros de toa Asturies.
La que será la mayor manifestación pola oficialidá de la hestoria va tar precedida de seis marches a pie dende Xixón, Avilés, La Pola Siero, La Felguera, Mieres y Trubia.
La marcha de Xixón va salir a les 9:30 de la Gasolinera Foro; la d’Avilés a les 9:00 d’El Parche; la xente del oriente ta convocáo a les 12:30 na Plaza Mayor de La Pola Siero. A les 11.00 nel Parque Vieyu de La Felguera saldrá la marcha del Nalón; La del Caudal será a les 12:30 dende la Plaza l’Ayuntamientu. La xente del occidente aconceyará en Trubia pa salir a les 12.00 dende l’Institutu.
Asinamesmo, les marches de Xixón y Avilés alcontraránse en Llugones a les 16:00; la de La Pola y La Felguera alcontraránse en Fonciello a les 14:00. La marcha del Caudal va tener el puntu d’alcuentru en Les Segaes a les 16:30 y la marcha de Trubia fará parada en San Cloyo a les 14:30.
Toles marches llegarán a la plaza la Estación del Norte a les 18:00, hora del entamu de la gran manifestación. El grupu La Bandina va actuar dando’l cierre a esta xornada reivindicativa.............................
.